आधुनिक तंत्रज्ञानाचा प्रत्यक्ष अनुभव : संगणक शास्त्र विद्यार्थ्यांची विश्वेश्वरय्या संग्रहालयास शैक्षणिक उद्योगभेट...
पंढरपूर (प्रतिनिधी) :- सिंहगड अभियांत्रिकी महाविद्यालय, पंढरपूर येथील संगणक विज्ञान व अभियांत्रिकी विभागातर्फे विद्यार्थ्यांच्या सर्वांगीण शैक्षणिक विकासाच्या दृष्टीने विश्वेश्वरय्या औद्योगिक व तंत्रज्ञान संग्रहालय, बेंगळुरू येथे दिनांक २५ जानेवारी २०२६ रोजी भव्य शैक्षणिक उद्योगभेट आयोजित करण्यात आली. या उद्योगभेटीत द्वितीय व तृतीय वर्ष बी.टेक संगणक विज्ञान व अभियांत्रिकी शाखेच्या एकूण ७० विद्यार्थ्यांनी उत्स्फूर्त सहभाग नोंदविला.
या उद्योगभेटीचा मुख्य हेतू विद्यार्थ्यांना विज्ञान व तंत्रज्ञानातील अत्याधुनिक औद्योगिक संकल्पनांचा प्रत्यक्ष अनुभव देणे तसेच शैक्षणिक अभ्यासक्रम आणि प्रत्यक्ष औद्योगिक जगतातील तंत्रज्ञान यांमधील सुसंगती अधिक दृढ करणे हा होता.
भेटीदरम्यान विद्यार्थ्यांना अवकाश तंत्रज्ञान, स्वयंचलन प्रणाली, आधुनिक हार्डवेअर, दळणवळण तंत्रज्ञान आणि कृत्रिम बुद्धिमत्ता आधारित अनुप्रयोग यांसंदर्भातील सजीव प्रात्यक्षिके व माहितीपूर्ण प्रदर्शनांचे अवलोकन करण्याची संधी मिळाली. संग्रहालयातील तज्ज्ञ मार्गदर्शकांनी अवकाश संशोधनातील नव्या संकल्पना, संगणक प्रणालींची कार्यपद्धती आणि तंत्रज्ञानाचा दैनंदिन जीवनातील प्रभाव याविषयी सखोल मार्गदर्शन केले.
या शैक्षणिक उद्योगभेटीमुळे विद्यार्थ्यांना केवळ पाठ्यपुस्तकापुरते मर्यादित न राहता प्रत्यक्ष तंत्रज्ञानाशी संवाद साधण्याची संधी मिळाली. विविध मॉडेल्स व प्रयोगात्मक सादरीकरणांमुळे विद्यार्थ्यांमध्ये वैज्ञानिक दृष्टिकोन विकसित झाला तसेच नावीन्यपूर्ण संशोधनाविषयी कुतूहल व आत्मविश्वास वाढीस लागला.
विद्यार्थ्यांनी ही उद्योगभेट अत्यंत ज्ञानवर्धक, प्रेरणादायी आणि अनुभवसमृद्ध असल्याची भावना व्यक्त केली. भविष्यातील व्यावसायिक कारकिर्दीसाठी आवश्यक तांत्रिक कौशल्ये विकसित करण्यास या भेटीने महत्त्वाची दिशा दिल्याचे त्यांनी नमूद केले.
ही शैक्षणिक उद्योगभेट मा. प्राचार्य डॉ. कैलाश जगन्नाथ करांडे यांच्या कुशल नेतृत्वाखाली व विभागप्रमुख डॉ. सुभाष व्ही. पिंगळे यांच्या मार्गदर्शनाखाली यशस्वीरीत्या पार पडली. विभागातील प्रा. उदय फुले, प्रा. जगदाळे, प्रा. पुनम गवळी व प्रा. रुपाली खंडागळे यांनी उत्कृष्ट नियोजन, समन्वय आणि विद्यार्थ्यांना सतत मार्गदर्शन करून ही भेट यशस्वी केली.