“ पुस्तक म्हणजे सुख - दुःखातला एक सच्चा मित्र. ” - कवी रवि वसंत सोनार
द. ह. कवठेकर हायस्कूल येथे पुस्तकभेट उपक्रम...
पंढरपूर (प्रतिनिधी /वार्ताहर /वृत्तसेवा) :- “ मानवी जीवनामध्ये पुस्तक म्हणजे सुख - दुःखात खंबीर सोबत करणारा एक सच्चा मित्र आहे. ” असे मत येथील सामाजिक कार्यकर्ते व विश्वविक्रमवीर कवी रवि वसंत सोनार यांनी व्यक्त केले. ते त्यांच्या जन्मवर्षाच्या सुवर्णमहोत्सवाच्या औचित्याने संकल्पित कला, क्रीडा, साहित्य, संगीत, सांस्कृतिक, अध्यात्मिक, सामाजिक आणि शैक्षणिक उपक्रमांच्या संकल्पांतर्गत पुस्तक भेट पंधरवड्याच्या कार्यक्रमात बोलत होते. पुढे बोलताना कवी रवि सोनार म्हणाले की - “ मानवी आयुष्यात सुखाचा स्विकार कसा करावा आणि दुःखाला खंबीरपणे सामोरे कसे जावे हे आपल्या मित्ररुपातील पुस्तक आपल्याला शिकवते. म्हणून पुस्तक हे एका अर्थी प्रत्येकाचा खरा मित्रच असते. ”
कवी रवि सोनार यांच्या वाढदिवसानिमित्त पुस्तक भेट पंधरवड्याच्या तिसऱ्या दिवशी श्री. व सौ. सविता रवि सोनार यांनी कवी रवि वसंत सोनार यांनी माध्यमिक शिक्षण घेतलेल्या द. ह. कवठेकर हायस्कूल या शैक्षणिक संस्थेच्या ग्रंथालयासाठी स्नेहभेट स्वरुपात महाराष्ट्रातील विविध भागातील अनेक लेखक, साहित्यिक, कवी आणि कवयित्री यांची वेगवेगळ्या प्रकाशनच्या माध्यमातून प्रकाशित करण्यात आलेली वैविध्यपूर्ण आणि वैशिष्ट्यपूर्ण पुस्तके मुख्याध्यापक मा. व्ही. एम. कुलकर्णी यांच्याकडे सुपूर्द केली. यावेळी ग्रंथपाल मा. रवि अत्रे, इतर शिक्षक व विद्यार्थी उपस्थित होते.
विद्यार्थी, विद्यार्थीनी यांना वाचनाची गोडी लागावी म्हणून आणि वाचाल तर वाचाल यास अनुसरून विद्यार्थ्यांबरोबरच शिक्षक, शिक्षिका तसेच साहित्य रसिक कर्मचारी वृंद यांना बहुविध पुस्तके वाचावयास मिळण्यासाठी श्री. व सौ. सविता रवि सोनार यांच्या या उपक्रमाचे पंढरपूर आणि परिसरातील साहित्यिक तसेच रसिक वाचकांकडून स्वागत व कौतुक होत आहे. सदर कार्यक्रम यशस्वी करण्यासाठी अनेक लेखक - लेखिका, रसिक वाचक यांचे विशेष सहकार्य केले. तर कवी रवि सोनार स्नेह परिवाराच्या वतीने विशेष परिश्रम घेण्यात आले.